LAOAG CITY – Inrakurak ni National Bureau of Investigation (NBI) Director Melvin Matibag nga ipatungpal ti ahensya ti pammilin ni Justice Secretary Fredderick Vida nga iserbi ti arrest warrant manipod iti International Criminal Court (ICC) kontra ken ni Senador Ronald “Bato” Dela Rosa.
Segun ken ni Matibag, ti pammilin kadakuada ket arestaren ni Senador dela Rosa isut gapuna a daytoy ti aramiden da ken saan a rumbeng a maitantan.
Inpetteng pay ti opisyal nga arestaren da ti pugante a senador, kayatna man wenno saan gapu ta masapol nga ipatungpal da ti linteg nga awan ti panagbuteng ken pabpaboran da.
Maipalagip a nagpila ni Dela Rosa ti petisyon para iti Temporary Restraining Order (TRO) wenno Status Quo Ante Order iti Korte Suprema tapno lapdan ti panangipatungpal ti arrest warrant manipod iti International Criminal Court iti Pilipinas, ngem inbasura ti kangatoan a korte iti botos a 9-5-1.
Kalpasan ti insidente ti pammaltog iti Senado idi Mayo 13, inpasigurado ni Matibag ti naan-anay a kooperasyon ti National Bureau of Investigation iti fact-finding panel ti Department of Justice ken inpaganetget na manen ti kari ti ahensya a maysa a transparent, napudno ken naurnus nga imbestigasyon.
Innayon na a nakitinnulong metten ti National Bureau of Investigation iti Criminal Investigation and Detection Group (CIDG) ti Philippine National Police a nagaramid ti sworn statements manipod kadagiti NBI personnel a naka-assign iti GSIS premises idi Mayo 13.
Inpaay met ti NBI iti CIDG ti access dagiti video recordings, radio communications, ken dadduma pay nga adda ti pakainaigan na a materyales manipud Mayo 11 agingga iti Mayo 13 nga adda ti pakainaigan iti operasyon kontra ken ni Dela Rosa.
