LAOAG CITY – Naminsan manen a nangiserbi ti National Bureau of Investigation (NBI) ti baro a warrant of arrest kontra iti televangelist a ni Pastor Apollo Quiboloy ken dadduma pay nga akusado maipapan iti kaso nga Human Trafficking.
Inserbi manen ti National Bureau of Investigation Region 11 ti warrant of arrest iti Kingdom of Jesus Christ nga inyestablisar ni Quiboloy idiay Davao City.
Segun ken ni National Bureau of Investigation – Regional 11 Director Archie Albao, naannayas a nagserbi ti warrant of arrest iti uneg ti maysa nga oras.
Rumrummuar a napan kinita dagiti otoridad ti underground a paset ti ar-aramiden pay ti Kingdom of Jesus Christ ngem saanda latta a nakita ni Quiboloy wenno asinoman kadagiti maseknan nga akusado iti nasao a kaso.
Mainaig iti daytoy, kiniddaw ni Israel Torreon, abugado ni Quiboloy ken ti Kingdom of Jesus Christ a saanen a mangitugot ti armas wenno kadagiti miembro iti panagserbi ti warrant kas ti inaramid ti National Bureau of Investigation.
Kunana a palubusanda met dagiti otoridad a makastrek iti simbaan no adda ti umiso a koordinasion dagitoy kadakuada.
