LAOAG CITY – Indauluan ti National Commission for Culture and the Arts ti pannakarambak ti Birth Centennial Logo ni Manlilikha ng Bayan wenno National Living Treasures Awardee Magdalena Galinato Gamayo.
Segun ken ni National Commission for Culture and the Arts Commissioner Reden Ulo, naisayangkat ti Birth Centennial Logo iti Brgy. Lumbaan-Bicbica iti ili ti Pinili babaen ti keynote message manipud ken ni Senate President Pro Tempore Loren Legarda ken introduksion iti birth centennial celebration ni National Commission for Culture and the Arts Chair Victorino Manalo pakairamanan dagiti mensahe ti suporta manipud iti Presidential Assistant for Northern Luzon, Assistant Sec. Ana Carmela Remigio, Ilocos Norte Gov. Matthew Marcos Manotoc ken Pinili Mayor Rommel Labasan.
Inbatadna a naiparang pay ti nasao nga aktibidad ti lineup dagiti aktibidad a naiplano para iti tawen maipanggep iti Birth Centennial Logo, a mangmarka iti panangrugi ti 100-day countdown iti birth centennial ni Manlilikha ng Bayan Gamayo inton Agosto 13, 2024.
Inlawlawagna a kas kangatuan nga ahensia a mangay-aywan iti cultural and artistic affairs iti pagilian, indauluan ti National Commission for Culture and the Arts ti selebrasion para ken ni Manlilikha ng Bayan Magdalena Gamayo.
Kunana nga inruar ti National Commission for Culture and the Arts ti Birth Centennial logo ni Manlilikha ng Bayan Magdalena Gamayo a nangrugi iti 100-aldaw a panagbilang iti daytoy a napateg nga okasion.
Kabayatanna, inpakaammona a panggep ti nasao a selebrasion a manggutigot kadagiti ub-ubing a kaputotan tapno ad-adda a maiwaragawag ti naisangsangayan a tawid ni Manlilikha ng Bayan Magdalena Gamayo ken dagiti manayon a pategna a nangsukog iti nabingbingay a pakasaritaan ken tradision ti komunidad nga Ilocano ken ti kultural a tawid ti pagilian.
