LAOAG CITY – Inbatad ni Mr. Marcel Tabije iti Provincial Disaster Risk Reduction and Management Office (PDRRMO) a mangiyuswat da intono bigat ti pre-disaster assessment tapno amwen dagiti rumbeng a maaramid para iti panagsagana ti gobierno probinsyal iti iduduprak ti bagyo Obet ditoy probinsya.
Segun ken ni Tabije, saan pay a naan-anay a nakarekobre ti dadduma a lugar ditoy probinsya gapu iti iduduprak ti bagyo Neneng ket adda manen ti bagyo Obet.
Nupay kasta, kuna na nga aar-aramiden da amin babaen ti panangidaulo ni Governor Matthew Marcos-Manotoc tapno matulungan dagiti residente a kangrunaan a naapektaran ti bagyo Neneng partikular iti ili ti Pagudpud ken ili ti Adams.
Inpakaammo pay ni Tabije nga adda ti dua nga helicopters ti Philippine Airforce nga agsubli koma iti ili ti Adams tapno mapan koma pay agikabil ti food packs ngem nagsubli gapu ta napigsa ti tudo ken saan a makita ti piloto ti pagdalanan da.
Mainaig iti daytoy, kuna ni Tabije a marigatan ti Ilocos Norte Electric Cooperative (INEC) a mapan agtarimaan kadagiti nadadael a linya ken poste ti kuryente gapu ta awan ti mabalin da a pagdalanan kalpasan a nadadael dagiti kalsada.
Inpasigurado ni Tabije nga agtultuloy ti panangtutuk da iti sitwasyon iti ili ti Adams agingga a saan a matarimaan dagiti kalsada ken maisubli ti suplay ti kuryente iti nadakamat a lugar.
