LAOAG CITY – Naipilan ti kaso nga attempted murder kontra iti suspek iti napasamak a pammaltog iti maysa a bar iti Barangay 5, San Pedro ditoy ciudad ti Laoag.
Nabigbig ti suspek a ni Mark Christopher Negre Buted, agtawen ti 31, negosyante ken residente iti Brgy. 26, Upay iti ili ti Paoay idinto a ti biktima ket ni Stephen Rapisora, agtawen ti 25, baro ken residente iti Brgy. 1, San Lorenzo ditoy ciudad ti Laoag.
Basar iti imbestigasyon ti Philippine National Police, kabayatan ti panagbayad ni Rapisora iti bill da ket napan kinomprontar ti suspek ken sinaludsud na no mano ti bayadan da.
Nupay kasta, tinallikudan ni Rapisora a bulon nan ti rimuar iti paggiinuman ngem sinaruno ti suspek ken ditoyen a maipagarop a nagpaputok ti paltog nga inturong na iti nasao a biktima.
Gapu iti daytoy, nagtaray ti biktima a nagsubli iti paggiinuman ngem sinurot manen ti suspek agingga a nakadanun da iti kusina.
Iti panagpaputok koma manen ti suspek ket saanen a pimmutok ti paltogna rason a rimuar a napan iti luganna bulon nan ti nagpataray, ngem natiliw metlaeng babaen iti naiyuswat a dragnet operation.
Saan metten a nangipaay dagiti otoridad ti dadduma a detalye mainaig iti kinatao wenno background ti nasao a suspek idinto a saan pay a masinunuo no ania ti nagbalin a tama ti biktima.
Nagtalinaed met ti suspek iti kustodyar ti Philippine National Police ditoy ciudad ti Laoag.
