LAOAG CITY – Masdaaw ni Mr. Tom Ganir, maysa a negosyante idiay ili ti Sarrat no kasano a simrek dagiti itlog ti pugo ditoy probinsya a maipagarop a naggapo idiay Tarlac.
Segun kenni Ganir, agamak isuna gapo kadagiti rumrumwar a report mainaig iti sakit iti poultry.
Gapo iti daytoy, kalilkagom ni Ganir a maadal wenno maamoan no kasano a napalubusan a simrek ti nasao a produkto ditoy probinsya iti laksid nga adda dagiti quarantine checkpoint.
Naamoan a gapo iti panagserrek dagiti itlog ti pugo ket bagsak ti negosyo da sipud pay itay napan a lawas gapo iti kinalaka ti presyo dagiti sumrek a produkto.
Inpetteng na a nasken a masurot ti alagaden mainaig iti pannaka-kontrol ti panagserrek ti nasao a produkto.
Rumrumwar a dagiti dadduma nga itlog ti pugo a naggapo iti sabali a probinsya ket alisto nga agibbong.
kabayatanna, inpetteng ni Dr. Loida Valenzuela, Provincial Veterinarian ditoy probinsya nga awan ti rason tapno mapawilan a sumrek ditoy probinsya dagiti produkto manipud iti poultry farm.
Segun kenni Valenzuela, mayat latta a sumrek dagiti produkto no laketdi adda dagiti kasapulan a requirements.
Karaman ditoy ket ti kaadda ti lisensya kas handler manipud iti Bureau of Animal Industry ken health certificate manipud iti farm veterinarian.
Daytoy ket tapno masigurado a natalged dagiti produkto a sumrek ditoy probinsya.
Inlawlawag na a no maysa kadagiti kasapulan a dokumento ti awan ket mapalubusan latta ngem no maulit ket mabalin a maisubli ti shipment ken no maikatlo nga inulit ti maseknan nga adda ti kurang ket maikonsiderar nga illegal shipment ken makanselar ti lisensya ti nangibyahe.
