LAOAG CITY – Nagtalinaed ti subject ti search operation iti kustudyar ti PNP kalpasan a nakarekobre dagiti otoridad ti nagduduma a klase ti bala, ken sumagmamano a paltog iti pagtaengan na idiay Brgy Anao iti ili a Piddig.
Nabigbig ti maseknan a ni Victor Delos Santos y Arcano, agtawen ti 42, naasawaan ken residente ti nasao a barangay.
Narekobre dagiti otoridad manipud iti tiangi da Delos Santos ti 16 a bala ti kalibre 45, maysa a bala ti M16, dua a bala ti kalibre 38, maysa a magasin ti M16 ken holster.
Segun kenni Police Sr. Insp. Jephre Taccad, hepe ti PNP Piddig, agaw-awat ni Delos Santos kadagiti agisalda ti paltog ken nakitkita dagiti concerned citizen nga agig-iggem ti paltog daytoy.
Nagyaman ni Taccad kadagiti concerned citizen a nagipakaammo ti impormasyon.
Innayon ti hepe a posible a mapilaan dagiti akin kukua kadagiti naisalda a paltog kenni Delos Santos no maamuan da nga awan umiso a dokumento dagitoy.
Iti mainaig a damag…Awan ti nasao ni Mr. Victor Delos Santos iti pannakatiliw na babaen ti search operation nga inwayat dagiti kameng ti PNP Piddig iti pagtaengan na idiay Brgy Anao Piddig.
Nupay kasta, nasakit ti nakem ni Mrs. Betty Delos Santos gapu ta sinerrek lattan dagiti otoridad ti solar da.
Kuna na a pinapanaw dagiti otoridad dagiti annak na nga agbanbantay iti tianggi.
Inadmitir ni Mrs. Delos Santos nga iti kallabes ket agaw-awat ti asawa na kadagiti maisalda a paltog ngem nabayagen a nasaka dagiti akinkukua idinto a dagiti bala ket saanen a naala.
Naglikodan na a dagiti narekobre a paltog ket saan da a kukua.
Inpakaammo ni Delos Santos nga adda ti dati a kaso ti asawa na mainaig ti iligal a panagikot ti paltog gapu ti ginatang da a paltog.
Kabayatanna, narekobre dagiti otoridad iti balay ni Victor Delos Santos ti maysa a kalibre 38 a paltog, ken ti maysa a magasin ti M16 a napno ti bala, ken naiplastic a nagduduma a bala nga naipalipit kadagiti sinaksako nga irik iti sango ti balay da.
Naala pay dagiti otoridad ti maysa a sumurai iti uneg ti lugan na nga Toyota Inova iti Brgy. 2 Anao, Piddig, Ilocos Norte.
Mainaig iti daytoy, naklaat ni Barangay Chairman Jessie Jacinto mainaig ti naiwayat nga search operation iti pagtaengan ni Delos Santos.
Kuna na a naipalaon iti search warrant a maipagrup nga agik-ikot ni Delos Santos ti nagduduma a bala ti armalite ken paltog.
Inbatad ni Jacinto, nga nakaala dagiti otoridad dagiti nagduduma a klase ti bala, magasin, kalibre 38 a paltog ken sabsabali pay.
Segun kenni Jacinto, awan ti ammo na a record ni Delos Santos iti barangay bayat ti panagtakem na.
Innayon ni Jacinto nga agnegnegosyo ni Delos Santos ti baboy, ken addaan da ti tianggi.
