LAOAG CITY – Simmangpeten ti negotiating team ti Israel idiay Cairo, Egypt tapno mangangay iti miting maipapan iti naisingasing a ceasefire deal.
Naiget nga itantandudo dagiti international mediators nga adda ti mapasamak a cease fire iti nagbaetan ti Israel ken Hamas.
Sumagmamano kadagiti kondision ti Israel ket ti nasken a panangiwayawaya kadagiti hostage nga iggem ti Hamas bayat nga inawagan met ti Palestinian Authority a pumanaw ti Israel iti Gaza.
Basar iti maitantandudo a ceasefire deal ti Egypt, Qatar ken Estados Unidos, tallo bansada ti nadakamat a ceasefire deal.
Karaman iti Phase 1 ti innem a lawas a ceasefire, panagsinnukat kadagiti hostage a babbai, nataengan ken sugatan nga indibidal ti Hamas kadagiti Palestinian prisoners ti Israel, withdrawal dagiti Israeli Forces manipud iti Gaza, panagsubli dagiti Palestinians kadagiti pagtaenganda idiay Gaza ken pannakaited ti tulong.
Kabayatanna, ti Phase 2 ket mairaman ti permanente a panagsardeng ti panagsusupiat, pannakawayawaya dagiti amin a hostage ken balud ti Gaza ken ti naan-anay a panagpanaw dagiti Israeli force bayat a ti Phase 3 ket ti multiyear reconstruction plan idiay Gaza ken ti panangisubli dagiti bangkay ti hostages ti Hamas idiay Israel.
