LAOAG CITY – Nangrugin a nagsuplay ti National Food Authority (NFA) kadagiti merkado publiko iti presyo a 27 a pisos iti kada kilo.
Segun ken ni Engr. Eleonor Andres, ti provincial manager ti NFA ditoy probinsya, ita laeng a lawas a rinugyan da ti nagsuplay kadagiti merkado publiko.
Inlawlawag na a dagiti NFA rice nga isupsuplay da kadagiti merkado publiko ket dagiti ginatang da nga irik nga apit dagiti mannalon ditoy probinsya.
Inpakaammo na pay a ti laeng naglakoan da kabayatan ti pandemya ket dagiti Local Government Units (LGUs), DSWD, Office of the Civil Defence, PNP, BJMP, ospitals, ken dadduma pay a private institutions a mangisaysayangkat ti relief operations.
Inbaga ni Andres nga awanen ti imported rice a naka-stock iti bodega da ken dagiti ginatang da nga irik kadagiti mannalon nga umabot iti 300 a ribo a sako ket isu ti pinabayo da nga inbunong kabayatan ti pandemya ken isu ti isupsuplay da kadagiti merkado publiko ditoy probinsya.
