LAOAG CITY – Inbatad ni Mrs. Josie Paulino, aglaklako ti itlog iti nasao Laoag City Public Market and Commercial Complex a ngimmato iti lima a pisos iti kada tray ti itlog nangrugi itay napan a lawas.
Inbatad na a dagiti presyo ti itlog iti kada tray nga ilaklako da ket 200 pesos iti kada tray ti XS, 210 pesos ti Small, 230 pesos ti Medium, 240 pesos ti Large idinto a 260 pesos ti Extra Large.
Inlawlawag na a ti panagngato ti presyo ti itlog ket gapu iti kinangina ti gatgatangen da a feeds, nangina a singir ti kuryente, nangato a presyo ti gasolina ken dadduma pay.
Segun met iti consumer a ni Mrs. Teresa Acosta, padagsen kadakuada ti kinangina ti itlog no sadino adda pay ti manamnama a panagbaliw ti presyo dagiti nadakamat a produkto iti masungsungad a lawas.
Immun-una ngem iti daytoy, inrakurak ti Agricultural Sector Alliance of the Philippines Inc. wenno AGAP a posible a nga agbalin ton a 10 agingga 15 pesos ti presyo ti kada pidaso gapu iti panangato ti production cost ken ti bird flu.
