LAOAG CITY – Manarimaan ti panagmula kadagiti kabanbantayan ken panagdalos kadagiti irigasion.
Daytoy ti inpakaammo ni Engr. Rommel Batuac, ti Chief Operations iti National Irrigation Administration.
Kunana a babaen iti daytoy ket matagiben iti aglawlaw ken mapapintas ti watershed kadagiti karayan.
Inlawlawagna a paigetanda daytoy a programa tapno maitultuloy ket saan a marigatanda dagiti mannalon maipapan iti pagpadanom kadagiti kataltalonan dagitoy.
Mainaig iti daytoy, inbatadna nga iti kallabes ket adda ti naisayangkat a panagmulada iti daya a paset ti probinsia kalpasan nga adda dagiti napasamak nga uram kadagiti kabanbantayan.
Mangnamnama ni Engr. Batuac ti pannakikammayet dagiti maseknan tapno masolbar dagiti parikot a sangsangoenda gubuay iti natural disaster.
