LAOAG CITY – Nagballigi ti nagtitipon a pwersa ti PNP-Sarrat, PNP-Badoc, PNP-Ilocos Sur ken ti Regional Intelligence Unit iti PNP-Region 1 a nangarestar ti maibilang a number 8 Wanted Person ditoy Ilocos Norte.
Nabigbig ti akusado a ni Mr. Felix Bermudez Jr. Y Taclay Alyas Bong, agtawen ti 44, awanan ti trabaho ken residente iti Barangay Bato iti ili ti Badoc.
Naamoan a natiliw ni Bermudez iti balay a mismo ti kabsat na iti Brgy Marnay, Sinait, Ilocos Sur babaen ti bileg ti maysa a warrant of arrest nga inparuk-at ni Hon. Judge Nida Alejandro iti RTC Branch 12 ditoy ciudad ti Laoag gapu iti kaso na a murder.
Ti akusado ket maysa kadagiti suspek iti pannakapapatay ni pannakapapatay Retired Police. Col. Jeffrey Gorospe a dati a chief of police ditoy ciudad ti Laoag idi Agosto 8, 2017 iti Barangay 7 iti ili ti Sarrat kalpasan a napaltu-paltugan daytoy.
Iti eksklusibo nga interview ti Bombo Radyo Laoag ken ni Bermudez, naglikudan na ti alegasyon kenkuana no sadinno nga inpasingked na nga awan ti ammo na iti pannakatay ni Gorospe.
Segun kenkuana, naamoan na laeng ti napasamak babaen iti panagdengdengngeg na laeng iti radyo, ken ti malagip na ket agtaltalon iti dayta a panawen.
Inpasingked na a sinungbatan na amin dagiti naawat na a subpoena ken adda pay ti counter-affidavit na isut gapuna a saanna a ninamnama nga adda pay laeng ti kastoy a kaso na.
Inadmitir na nga immunan a naibalud gapu iti kaso a murder ken sipud rimuar ket kanayunen a mapabpabasol nga uray awan ti aramid na.
Inbaga ni Bermudez a daytoyen ti maikatlo a gundaway a naakusaran ti pammapatay ngem kuna na a naibasura amin dagiti immuna a kaso a naipila kontra kenkuana.
Nakasagana met ni Bermudez a mangsango ken mangipaneknek nga inosente daytoy iti maipabpabasol kenkuana.
Naiturnover ni Bermudez iti PNP iti ili ti Sarrat gapu ta iti nasao nga ili ti nakapapatayan ni Gorospe.
