LAOAG CITY – Naiget a maipatpatungpal ti “No Segregation, No Collection Policy” ditoy siudad ti Laoag.
Segun ken ni Ms. Mylene Pascual, mangidadaulo ti Community Environment and Natural Resources Office ditoy siudad, bumasbassiten dagiti residente nga aglablabsing iti nasao a pagannurotan.
Inbatadna a daytoy ti mangipasimudaag a natulnog dagiti residente manipud kadagiti nagduduma a barangay ditoy siudad ti Laoag.
Inlawlawagna a naiget a maipakpakat ti pagalagadan no sadinno a maisubli ti basura ti maysa a pagtaengan wenno pasdek negosio no nakita dagiti garbage collectors a saan pay a na-segregate dagiti basurada.
Innayonna no adda ti mapaneknekan a naglabsing iti Oplan Dalus Code ket mamulta ti maysa a ribu a pisos ken maikabil ti 50 a porsiento iti biang ti lokal a gobierno idinto a ti kaguduana a 50 a porsiento ket maipaay iti apprehending enforcer.
