LAOAG CITY – Kinumpirmaran ni Mr. Roger Daquioag, ti Department of the Interior and Local Government wenno DILG Provincial Director ditoy Ilocos Norte a possible a maipatungpal ti “No Vaccine, No Work Policy” ditoy Ilocos Norte gapu addan ti umdas a suplay ti bakuna a maaw-awat ti probinsia.
Inrakurak daytoy ti opisyal kalpasan a nangiparuk-at ti resolusyon ti National Inter-Agency Task Force wenno NIATF a dagiti lugar nga adda ti umdas a suplay ti bakuna na ket nasken nga i-required dagiti establishimento ken empleado kadagiti pribado ken pampubliko a sektor nga agpabakuna kontra iti COVID-19.
Nupay kasta, kasapulan latta nga adda ti maiyetnag a linteg wenno mandar manipod iti Office of the Malacañang wenno mismo iti Office of the President a mangaprobar iti daytoy a banag.
Inlawlawagna a namunganay daytoy a banag kalpasan a pormalen a maiyim-implimentar ti “No Vaccine, No Work Policy” iti Lokal a Gobierno idiay Iloilo City gapu ta saandan nga agkurkurang ti suplay ti bakuna.
Maipalagip nga inrakurak ni Provincial COVID-19 Consultant Dr. Norman Rabago a saanen nga agkurkurang ti maaw-awat a COVID-19 vaccines ti probinsia gapu ta agsasaruno dagiti mait-ited a bakuna manipod iti Department of Health (DOH).
Immunan a kiniddaw dagiti sumagmamano nga agpanpanday linteg iti Kamara de representantes ken Labor Groups a saan pay laeng a maipatungpal ti nasao nga addang.
