LAOAG CITY – Nagkari ni North Korean leader Kim Jong Un a palawaen da pay ti nuclear arsenal ti pagilian da.
Iti panagbitla ti North Korean leader, indeklarar na a gagem na nga agbalin a military superpower ken tunusan da dagiti pangta ti Amerika.
Inpetteng ni Kim a saan pulosen nga agbalbaliw ti posisyon ti North Korea kas maysa a nuclear-armed state.
Inpasingked na nga ad-adda pay a papigsaen na ti nuclear deterrent para iti panangdepensa ti pagilian da.
Dinakamat na pay ti pananglaban kadagiti “hostile forces,” no sadinno nga inawagan na ti South Korea a “most hostile state” a tunusan da ti naiget nga addang.
Immunan a nangipasa ti North Korea ti linteg a mangipalubos ti preemptive nuclear strike no adda ti pangta iti pagilian da.
Ti rakurak ti North Korean leader ket paset ti agtultuloy a panangpatibker ti komunista a pagilian nuclear policy da iti baet dagiti international sanctions.
