LAOAG CITY – Inrakurak ti North Korea a dadaelen da amin a kalsada ken railway a mamagkamang iti South Korea tapno naan-anayen nga agsina ti dua a pagilian.
Indiskribir ti Korean People’s Army (KPA) ti nasao nga addang kas “self-defensive measure” para iti pananglapped ti gubat.
Inpetteng pay ti komunista a pagilian a ti addang da ket sungbat da kadagiti war exercises iti South Korea ken ti masansan a pannakaipaay dagiti nuclear asset ti Amerika iti rehiyon.
Maipalagip nga inwaragawag ni North Korean ruler Kim Jong Un iti panangrugi ti 2023 nga awan pulosen ti plano na a makikapia iti South Korea ken inpetteng na a ti gubat ket agtultuloy iti Korean peninsula.
