LAOAG CITY – Nangiparuk-at ti North Korea iti ballistic missile sakbay ti tinawen a joint military drills iti nagbaetan ti Estados Unidos ken South Korea a pagaammo kas Ulchi Freedom Shield, a maiwayat iti 11 nga aldaw manipud Lunes, Agosto 17-27.
Daytoy ti maikadua a ballistic missile test ti pagilian iti las-od ti maysa a lawas, daytoy ket kas protesta kontra kadagiti military drills a makitana kas panagensayo para iti panangraut.
Segun iti Joint Chiefs of Staff ti South Korea, ti ballistic missile ket manipud iti daya a paset ti coastal Wonsan Area nga agturong iti East Sea, a pagaammo met kas Sea of Japan.
Mainaig iti daytoy, nakasagana ti South Korea a makitinnulong iti Estados Unidos tapno malappedan ti aniaman a provocation ti North Korea.
Kabayatanna, ginutigot met ti presidential national security council ti Seoul iti Pyongyang nga isardengnan ti panangiparuk-at kadagiti ballistic missiles, nga inawaganna kas act of provocation a mangsalungasing kadagiti resolusion ti United Nations Security Council.
