LAOAG CITY – Mai-lockdown ti Northcrest Subdivision a masarakan iti Brgy. 46 Nalbo, ditoy ciudad ti Laoag para iti contact tracing kalpasan ti panagpositibo ti agtawen ti lima nga ubing wenno ni IN-C14.
Ummuna iti daytoy, iti statement ni Mayor Michael Marcos Keon, nagturong isuna iti Northview Hotel tapno makataripnong ti agtagikua ken mapagsaritaan ti sitwasyon.
Kadwa ni Mayor Keon dagiti opisyales ti Brgy. Nalbo nga idadaulwan ni Brgy. Captain Ruben Roque, Laoag City PNP Chief Lt. Col Amador Quiocho ken ni Dr. Joseph Adaya iti City Health Office.
Inlawlawag na nga addan ti local transmission ditoy ciudad gapo ta rumrumwar a ti Air Force personnel a nagpositibo met iti virus itay kallabes ket nakapulapol ti manager ti PAL nga isu met ti nakapulapol ti agtawen ti lima nga ubing.
Naamoan a ti PAL manager ket nagtalinaed pay laeng iti Northview Hotel sakbay a napan iti Camella Homes.
Mainaig iti daytoy, saan a mapalubusan dagiti agnanaed iti subdibisyon agingga iti 11:59 ti rabii ti Agosto 3 malaksid kadagiti health workers, miembro ti PNP ken AFP, ken dadduma pay a kasapulan ti serbisyo na.
