LAOAG CITY – Dinayyeg ti magnitude 6.3 a gingined ti amianan a paset ti Japan basar iti Japan Meteorological Agency (JMA).
Nairekord ti panagdayyeg ti agarup alas-8:22 ti rabii idi Biernes iti kabaybayan nga asideg iti amianan ti Miyagi Prefecture.
Awan ti inparuk-at a tsunami warning ken awan ti naipadamag a nadadael kalpasan ti gingined.
Ti nasao a panagdayyeg ket kagiddan ti napigpigsa a magnitude 7.7 a gingined a timmama iti kapada a rehion idi Abril.
Nagballaag ti Japan Meteorological Agency a posible latta ti napipigsa a panagdayyeg iti lugar uray naikkaten ti immunan nga earthquake advisory.
Kabayatanna, awan ti nairekord nga abnormalidad kadagiti nuclear power plant iti Miyagi ken iti kaparanget a Fukushima Prefecture.
Gapu iti napasaran a gingined ket temporario nga inpasardeng ti operasion ti Shinkansen bullet trains basar iti East Japan Railway.
Masarakan ti Japan iti maaw-awagan a Pacific “Ring of Fire,” isut gapuna a masansan a makapaspasar ti gingined.
