LAOAG CITY – Inpasigurado ti National Security Council (NSC) a nakabantay kadagiti aktibidad nga adda ti pakainagan na iti maika-80 a panagkasangay intono bigat ni dati a Presidente Rodrigo Duterte.
Segun kenni National Security Council Assistant Director General Jonathan Malaya, awan ti naawat da nga intelligence report nga adda it pangta iti seguridad.
Nupay kasta, kuna ni Malaya a nakamonitor met ti intelligence community kasta met ti Philippine National Police ken Armed Forces of the Philippines.
Kuna ni Malaya a saan met a baybay-an ti security sector ti panagbantay iti seguridad a gagem na a masigurado ti kapya ken stability ti pagilyan.
Mainaig iti daytoy, inpasigurado met ti Armed Forces of the Philippines ti suporta na iti Philippine National Police iti panangipatungpal ti kapya iti Pilipinas.
Inlawlawag ni AFP Vice Chief of Staff LtGen. Jimmy Larida a mandato ti armada ti Pilipinas a suportaran ti nailyan a pulisya iti panangipatungpal ti law enforcement operation.
Inpanamnama pay ti heneral nga adda ti ar-aramiden da nga addang tapno agtalinaed ti talna iti pagilyan ngem saan nan nga indetalye pay dagitoy.
Inpetteng na pay nga iti laksid ti mapaspasamak ita iti benneg ti pulitika ket agtalinaed a propesyunal ken non-partisan ti armada, kasta met nga agkaykaysa dagitoy.
Innayon na nga agtultuloy met ti panangpalagip ni AFP Chief of Staff Gen. Romeo Brawner kadagiti soldado nga aramiden da ti mandato da nga agbalin a napudno iti sinapataan da a trabaho.
