LAOAG CITY – Inbatad ni Atty. Ana Minelle Maninding, ti legal officer ti National telecommunications Commissions (NTC) iti Region 1 nga awan met ti nagbalin a problema iti panangisayangkat da ti SIM Card Registration Caravan iti ili ti Pasuquin.
Segun kenni Maninding, iti kada telco ket nai-set up iti mismo a lugar tapno asistiran dagiti tattao nga agirehistro ti SIM Card da.
Inlawlawag na a nagduduma nga age group ti inasistiran da ngem kaadoan ket dagiti senior citizen.
Kuna ni Maninding a nagpatingga idi Enero 23 ita a tawen ket addan ti 24, 572, 555 ti nairehistro a simcard kadaiti tallo a telcos wenno 14.54 a porsiento pay laeng manipud iti target a 106 a milyon a simcard.
Mainaig iti daytoy, inbatad na a sipud nangrugi ti panagparehistro ket bimmaba ti bilang dagiti agrepreport seknan iti text scam ngem saan pay laeng a malapdan gapo ta adda pay ti sumagmamano a bulan sakbay a madeactivate dagiti saan a mairehistro.
Pinalagipan pay ni Maninding ti publiko nga agannad amangan no mabiktima iti daytoy ken saan a mamati kadagiti agidiaya ti tulong kasukat ti bayad para iti panagparehistro gapo ta daytoy ket libre.
Kabayatanna, binalakadan ni Maninding ti publiko kangrunaan na kadagiti saan pay a nakaparehistro nga irehistron ti simcard da tapno saan a ma-deactivate kalpasan ti Abril 26 a panagngudo ti simcard registration.
