LAOAG CITY – Nabigbigen ti maysa a bangkay a narekobre iti kabanbantayan a paset ti Barangay Burayoc iti ili ti Pagudpud.
Segun ken ni Police Major Carlo Abing, ti chief of police iti ili ti Pagudpud, ti bangkay ket maysa a nursing student ken residente iti Barangay 23 ditoy ciudad ti Laoag.
Kuna na nga iti pannakikoordinar na iti Philippine National Police ditoy ciudad ti Laoag ket idi laeng miyerkules, Oktubre 8 ket napan inreport ti pamilya na ti nasao nga estudyante a mapukpukaw.
Immuna iti daytoy, nagreport kadakuada ni Barangay Chairman William Cajilpo iti Barangay Burayoc nga adda ti nangkettel iti biagna iti nadakamat a lugar isut gapuna a dagus da a napan nagresponde kadwa da dagiti kameng ti Bureau of Fire Protectio ken ti Rural Health Unit iti ili ti Pagudpud.
Inpakaammo ni Abing a basar iti pamilya ti biktima ket agsagsagaba daytoy ti depresyon kalpasan a saanna a maawat nga adda ti saanna a naipasa a subject na para iti kurso na a nursing.
Awan met ti nakita dagiti otoridad a foul play iti pannakatay ti nasao a biktima.
