LAOAG CITY – Inpeksa ni Ms. Frances Bayudan, ti maysa a nursing student ken residente ti Brgy. 16 iti ili ti San Nicolas ti sakit nakemna iti Barangay Council iti nasao a barangay.
Segun kenkuana, daytoy ket kalpasan a napan nagpatulong iti Barangay Hall-da idi Pebrero 18 ita a tawen tapno masolbar koma ti problema iti nagbaetanda iti kabagian ni Kapitan Federico Simpliciano maipapan iti maysa a post iti online ngem maipagarup a saan a napintas ti pannakatratar ti konseho kenkuana.
Inbatadna a timmawag ti lolana ken ni Maria Amelia Aleta no sadino inadmitirna nga isuna ti dakdakamatenna iti in-post ni Irene Tumamao.
Kunana a nagkatkatawada kabayatan iti kaaddana iti Barangay Hall ken saanda a nirespetar dagiti inbagbagana kadakuada agingga nga awan ti nasayaat a resulta iti nagsasaritaanda iti sabali a partido.
Mainaig iti daytoy, kuna ni Ms. Maria Amelia nga awan ti nagbasolanna ken ni Ms. Frances ken nagkalikagum daytoy a makisarita kenkuana ngem timmalaw met daytoy iti Barangay Hall.
Inlawlawag met ni Mrs. Irene a saan a ni Ms. Frances ti itudtudona iti in-post iti online ken awan ti dinakamatna a nagan daytoy.
Kunana nga iti katengngaan ti panagsasaritada iti Barangay Hall ket bimmara iti situasion ket ditoy a kellaat daytoy a nag-walk out wenno timmalaw a saan man laeng a nagpakada ken ni Kapitan Simpliciano.
Kabayatanna, inpakaammo ni Kapitan Simpliciano ket sinangoda met a nasayaat ni Ms. Frances ngem adda dagiti banag a saanda a nagsinnurutan kas ti pannakaiskedyul ti panagsasaritada a maseknan, panangipatulod ti subpoena kadagiti mairekreklamo ken dadduma pay gapu ta kayat ti agrekreklamo ket insigida dagitoy a mapaayaban banag nga inpettengna nga adda ti umiso a proseso daytoy.
