LAOAG CITY – Inbatad ni Mr. James Ceasar Ventura, ti National Youth Commissioner – at large a nakaragragsak da gapu ta siguradon a matuloy ti SK ken Barangay elections intono Mayo 14 ita a tawen.
Iti eksklusibo nga interview ti Bombo Radyo Laoag ken ni Ventura, inbatad na a 2013 pay laeng ti naudi nga adda ti naipatugaw nga opisyal ti SK ken ti pondo da ket nagtalinaed kadagiti barbarangay.
Mainaig ti daytoy, inpakaammo ni Ventura nga agsursur da manen kadagiti nagduduma a barangay ken pagadalan tapno gutiguten da dagiti agtutubo nga agrehistro intono panagpipilaan ti certificate of candidacy (CoC).
Innayon na a masapol nga adda dagiti agtaray nga opisyal ti Sang Kabataan.
Kuna pay ni Ventura a gagem ti panagsursur da kadagiti nagduduma a barangay ken pagadalan ket tapno iburay da kadagiti agtutubo dagiti pagibasaran ti rumbeng nga agbalin nga opisyal ti SK.
