LAOAG CITY – Naannayas ken naurnos ti nagbalin nga inisyal nga assessment ti Philippine National Police (PNP) para iti pakabuklan nga obserbasion ti Holy Week Exodus ita a tawen.
Inbatad ni Philippine National Police Chief PGen. Jose Melencio Nartatez Jr., awan ti nairekord a major incidents a nakaapektar iti pakabuklan nga obserbasion ti Lenten Season.
Inlawlawagna a nagtalinaed a prioridad ti pulisia ti natalged a panagsubli dagiti biahero kalpasan ti sumurok maysa a lawas a naiyalokar tapno agngilin.
Kunana a kas panangipakita ti panangipaay ti pateg iti kinatalged ken kinaurnos ket agtalinaed a naka-deploy kadagiti nagduduma a lugar ti agarup 98 a ribu a kameng ti nailian a pulisia.
Dagitoy ket naiwaras kadagiti nagduduma a pagpasiaran iti pagilian, dagiti transportation hubs pakairamanan dagiti kangrunaan a kalsada.
