LAOAG CITY – Emosyunal a nagkiddaw ti tulong iti Bombo Radyo ni Angela Francia, tubo iti Pagudpud, Ilocos Norte ken agtrabtrabaho kas OFW iti Jeddah, Saudi Arabia.
Daytoy ket mainaig iti pannakamaltrato na no sadinno a saan a pinakan ti amo na iti lima nga aldaw, idinto a danum laeng ken bulbulong ti ipapauneg na.
Segun kenni Francia, saan nan a kabaelan ti trabaho na gapu ta uppat pay a kadsaaran ti balay ti daldalusan na iti kada a aldaw.
Kuna na nga agunget ti amo na a babai no mangan daytoy ken uray dagiti annak ti amo na ket saan da pay a kasarsarita.
Inbatad ni Francia a saan a makaluto ti kanen na gapu ta nakabantay dagiti amo na.
Inbunannag na a nagreport daytoy iti agency idiay Jeddah ngem nabalakadan laeng daytoy a makisarita iti agency ti amo na tapno maikkan ti makan.
Kuna na pay a nagpatulong iti kasinsin na ditoy probinsya ken naipost iti social media ti sitwasyon na ngem nakaunget ti agency a Non Stop Agency.
Innayon na a kayat na a maikkan ti solusyon ti problema ken maisalakan manipud kadagiti amo na.
Immunan a nagturong ni Francia iti Saudi Arabia tapno masupusupan ti panagkasapulan ti pamilya na nangruna dagiti dua nga annak na.
Iti agdama ket nakatutok ti OWWA iti sitwasyon ni Francia ken manamnama a masolbar daytoy iti kabiitian a panawen.
Kabayatanna, inbatad ni Miss Nuraiza Barola, maysa nga OFW idiay Saudi Arabia nga addan ti pannakisarita na iti OFW a ni Mrs. Angela Francia iti ili ti Pagudpud, ti saan a pakpakanen ti amo na.
Inbalakad ni Barola kenni Francia a saanen nga agtrabaho tapno mapilitan ti amo na a mangikkat kenkuana iti trabaho.
Inlawlawag na a nu awan pay ti tallo a bolan nga agserserbi ti maysa nga OFW iti amo na ket mabalin pay laeng a maisubli iti agency tapno maiburukan ti baro nga amo.
Mainaig iti daytoy, kuna ni Barola a nu saan nga italek ti agency ni Francia ti sitwasyon na ket mabalin a mairikep ti agency.
Inpakaammo ni Barola a sidadaan a mangtulong kenni Francia tapno alalisto ti pannakasolbar ti problema na.
