LAOAG CITY – Kalikagum ni Bombo International News Correspondent Ronil Zamudio manipod idiay Brunei ti umiso a pannakaipaay ti sueldo kadakuada.
Daytoy ti kiddawna a maipadanon ken ni Presidente Ferdinand Bongbong Marcos Jr. kabayatan ti state visit-na idiay Brunei.
Segun ken ni Zamudio, daytoy ket kalpasan nga adda latta dagiti padana nga Overseas Filipino Worker a saanda dagus a maawat ti sueldoda manipod kadagiti employers-da.
Inbatadna nga adda pay dagiti gundaway a maitantan ti pannakaiyawat ti sueldo dagiti padana a mangmangged iti nasao a pagilian a maikanniwas iti nailanad iti pinirmaanda a kontrata.
Malaksid iti daytoy, kiniddaw pay ni Zamudio ken ni Presidente Marcos ti pannakaisubli dagiti opisina ti Social Security System ken Pag-IBIG gapu ta adu pay kadakuada ti saan pay a nakaaplikar kadagitoy banag a kasapulanda kas maysa nga Overseas Filipino Worker.
Innayonna nga adda ti Meet and Greet kaduada ni Presidente Marcos ngem saanda unay a nakasarsarita gapu iti naruay a pakakumikuman ti Presidente.
Inpakaammona a napintas nga adda ti katulagan a nagpinnirmaan iti nagbaetan da Presidente Marcos ken ni Brunei Sultan Hassanal Bolkiah maipapan iti tourism cooperation tapno ad-adda nga adda dagiti gangganaet nga agturong iti pagilian.
Kabayatanna, naammoan a ni Zamudio ket maysa a Company Driver iti maysa a Construction Firm idiay Brunei ken addan ti 11 a tawen daytoyen nga agserserbi kas maysa nga Overseas Filipino Worker iti nasao a pagilian.
