LAOAG CITY – Inbatad ni Mrs. Marissa Alcantara, mangidadaulo ti TESDA-Ilocos Norte nga adda ti ididiaya da a TESDA Tulong Trabaho Scholarship Program ken Training for Work Scholarship Program.
Segun kenni Alcantara, prayoridad iti daytoy dagiti OFWs a nagsubli ditoy Pilipinas ken dagiti displaced workers nga isuda ti maysa kadagiti kangrunaan a makatultulong iti ekonomiya.
Inlawlawag na a dagitoy ket maipaayan da ti stipend 150 iti inaldaw, insurance, libre a training, libre nga assessment ken national certificate no pumasa da iti assessment.
Kunana nga adda met dagiti requirement no sadinno ket masapol a Filipino citizens, saan a recipient ti anyaman nga Scholarship Program iti sabali nga ahensya ti gobierno.
Mainaig iti daytoy, kunana a gagem da a makatulong babaen iti training tapno makabirok ti pagsapulan dagiti maseknan nangruna ita a panawen ti pandemya.
Inyunay-unay met ni Alcantara a ti diaya da ket first come first seve basis.
Kabayatanna, kunana nga iti sabali met a training ket adda met para kadagiti out of the school youth, drug surrenderers, PWD, womens group, fisherfolks ken farmers.
Rakurak na daytoy kabayatan ti pannakaselebrar ti Labor Day ditoy pagilyan.
