LAOAG CITY – Nangisubmitir ti surat ti grupo a TINDIG Pilipinas iti Office of the Ombudsman partikular ken ni Ombudsman Jesus Crispin ‘Boying’ Remulla.
Iti surat a naipatulod iti nasao nga opisial, gagemda nga allukoyen isuna tapno agtignay wenno imbestigaran dagiti alegasion a nakaipalaon iti articles of impeachment a naipila kontra ken ni Vice President Sara Duterte.
Inpetteng ti nasao a grupo a nasken a saan nga iwalin ti isyu ken alegasion a sangsangoen ti Bise Presidente.
Inpasigurado mismo ni Ombudsman Remulla a saanna a baybay-an dagiti alegasion wenno isyu ti korapsion a maibakbakal ken ni Bise Presidente Duterte.
Maysa ti confidential and intelligence funds ti kalikagum ti grupo a paimbestigaran iti Ombdusman ngem inadmitir ni Remulla a kasapulanna pay laeng nga umuna a basaen ken tingitingen a naimbag ti surat.
Nupay kasta, kuna ni Ombudsman Remulla nga ikonkonsiderarna ti ‘articles of impeachment’ kas tarabay iti maiwayat a fact-finding.
Maipalagip a saan a natuloy ti ‘impeachment trial’ kontra ken ni Vice President Sara kalpasan a na-archive ti articles of impeachment.
Immuna iti daytoy, indeklarar ti Korte Suprema nga ‘unconstitutional’ wenno maikanniwas iti Konstitusion ti nasao nga impeachment.
