LAOAG CITY – Nagballaag ti Office of the Ombudsman kontra kadagiti opisial ti gobierno ken empleado iti panagusar ti gasolina a naiyalokar para kadagiti lugan ti gobierno ngem nausar iti pribado a luganda kabayatan ti agtultuloy a panagngato ti presio ti produkto a petrolio.
Daytoy ket kalpasan nga adda naduktalan ti Ombudsman nga opisial nga agar-aramid iti daytoy a nangitunda ti pannakaikkatna iti puesto.
Segun ken ni Ombudsman Jesus Crispin Remulla, naikkat iti puesto ni Bohol Second District Provincial Board Member Vierna Mae Boniel-Maglasang iti serbisio para iti two counts a Serious Dishonesty.
Naikkat ti karebbenganna iti aniaman a civil service examinations ken naibabawi pay ti retirement benefits-na.
Kinuna ni Remulla a ti naaramid ni Boniel-Maglasang ket mangipasimudaad ti interes ti material gain ken mangitunda ti graft and corruption.
