LAOAG CITY – Inrakurak ti baro a nadutokan nga Ombudsman a ni Jesus Crispin ‘Boying’ Remulla nga aramidenna a nakalukat iti publiko ti Statement of Assets, Liabilities, and Net Worth wenno SALN dagiti opisial ti gobierno.
Iti umuna nga aldaw a panagtugawna kas maika-pito nga Ombudsman, inbatadna nga agaramid ti baro a pagannurotan tapno maaddaan ti ‘access’ ti tao iti nasao a dokumento.
Inlawlawagna nga inton sumaruno a lawas ket planona nga insigida a mangiparuk-at ti memorandum tapno mangbukel kadagiti pagalagadan para iti panangkiddaw ti kopya ti dokumento.
Nupay kasta, kunana a ti panangipublikar iti daytoy ket kitaen latta ti implikasion wenno epekto nangruna iti seguridad ti pagilian tapno saan a mausar wenno ma-weaponize.
Kabayatanna, inpakaammo ni Ombudsman Boying Remulla a planona a sublianan ti isyu mainaig iti Pharmally scandal.
Inbatadna a maminsanna manen a tingitingen ti nasao a kaso iti napalabas a pandemia ditoy pagilian.
Kunana a maipangpangruna daytoy gapu ta arig nalipatanen ti isyu ti Pharmally.
Mamati isuna a nasken a saan daytoy a malipatan ken maammoan ti kinapudno ti napasamak.
Maipalagip nga iti naisayangkat a panagdengngeg idi ti Senate Blue Ribbon Committee ket natalantan mainaig iti isyu iti binilyon a pundo nga ingatang ti Department of Health para kadagiti overpriced a medical supplies iti kangitingitan ti pandemia.
