LAOAG CITY – Panggep ti Department of Health (DOH) nga irugi ti online consultation system para kadagiti mpox patients iti intero a pagilian.
Segun ken ni Health Assistant Secretary Albert Domingo, babaen ti national action plan kontra mpox, target ti ahensia ti panagkiddaw iti tulong manipud iti Philippine Dermatological Society iti panangipasdek iti website a pakakonsultaan dagiti masuspetsa a kaso.
Kitkitaen ti ahensia ti agpatulong kadagiti eksperto manipud iti PH Dermatological Society, PH Society for Microbiology and Infectious Diseases and Pediatric Infectious Diseases Society of the Philippines tapno ad-adda a madanon ti screening, testing ken referral dagiti mpox patients.
Kabayatanna, nagballaag ti ahensia kontra kadagiti saan a nakumpirmaan a kaso ti mpox.
Kinunana nga adu ti klase ti sakit ti kudil a mapagkamalian a mpox kas iti chickenpox, shingles wenno ringworm.
Indagadag ti ahensia kadagiti lokal a gobierno a sakbay a mangipaulog kadagiti advisories a mainaig kadagiti kaso ti mpox iti sakupda, ket nasken a suportaran daytoy babaen ti umdas a sientipiko nga ebidensia tapno maliklikan ti panagbuteng ken pannakariro iti publiko.
