LAOAG CITY – Maisayangkat ti opening program ken dagiti track and field events ti Region 1 Athletic Association iti Ferdinand Edralin Marcos Stadium ditoy siudad ti Laoag.
Daytoy ti inpakaammo ni Atty. Donato Balderas, ti Schools Division Superintendent ti Department of Education – Ilocos Norte.
Segun kenkuana, addan ti immay a pannakabagi ti technical team manipod iti regional office tapno makita ken mamonitor dagiti pagadalan a mausar para iti pannakaiyuswat ti nasao nga aktibidad.
Inbatadna nga iti laksid a ti Ilocos Norte ti ag-host ita a tawen ti Region 1 Athletic Association ket adda latta ti koordinasion ken pannakikammayetda kadagiti regional offices.
Kunana a dimmawatda ti pammalubos ken ni Gov. Matthew Marcos Manotoc tapno agbalin nga host ti probinsia banag a pinatgan ti Gobernador ti nasao a kiddaw.
Inlawlawagna a basar iti napagsasaritaanda iti rehion uno ket nabingaybingay dagiti aramiden wenno akem dagiti komite tapno agballaigi ti pannakaipatungpal ti naindaklan nga aktibidad ditoy probinsia kangrunaanna manipod ditoy probinsia ken ti Provincial Government of Ilocos Norte kas main host ti Region 1 Athletic Association.
Mainaig iti daytoy, kuna ni Atty. Balderas nga adda ti pakabuklan a 14 nga schools division iti intero a rehion uno rason a masapol ti 15 agingga 16 a pagadalan nga usaren dagiti maseknan nga atleta, technical officials ken dadduma pay.
Innayonna nga iti agdama ket maiyur-uray pay laeng ti iskedyul ti Region 1 Athletic Association Board Meeting tapno ditoy a mapagnunumoan dagiti banag a kasapulan kabayatan ti pannakaisayangkat ti nadakamat nga aktibidad.
