LAOAG CITY – Inlawlawag ni Police Major Jephre Taccad, ti pannakangiwat ti Ilocos Norte Police Provincial Office (INPPO) a nagtalinaed a suspendido ti operasyon ti cockpit arena ditoy probinsya.
Daytoy ket paset iti inpaulog ti IATF a Resolution No 103. S 2021 idi March 18, 2021 a mangibagbaga a suspendido ti panagpapallot pakairamaman kadagiti lugar nga adda iti babaen ti MGCQ.
Segun kenni Taccad, sakbay nga inpaulog ti IATF ti resolusyon ket nagoperar ti cockpit arena iti ili ti Badoc idi Marso 17, 2021.
Gapo iti daytoy, kunana nga idi naibaba ti resolusyon ket dagus da nga inpakammo idi nasao nga ili tapno saanen a maituloy ti operasyon ken awan ti malabsing a pagalagadan.
Mainaig iti daytoy, inbatad ni Taccad a no man maipalubos ton ti operasyon ti cockpit arena ken basar iti guidelines wenno EO ni Gov. Matthew Marcos Manotoc, masapol nga adda ti clearance manipud iti IATF ken addaan ti permit.
Inbatad na a no maipasublin ton manen ti operasyon ti cockpit arena ket naiget a maipawil ti live streaming.
Kabayatanna, kuna ni Taccad a nakamonitor da kadagiti cockpit arena ditoy probinsya.
