LAOAG CITY – Inpakaammo ni Vice Mayor Maribel Albano iti ili ti Vintar nga adda ti maiyuswat a libre nga “Operation Smile” para kadagiti adda ti rangkap ti bagina.
Segun kenkuana, agturong laeng mismo iti opisina ti Bise Mayor para iti screening inton Pebrero 27 ita a tawen.
Inbatadna a kalpasan iti pannakaipadalan dagitoy iti konsultasion ket dagus a maipadalanda iti operasion inton Pebrero 28 ken 29.
Inlawlawagna a malaksid kadagiti agsagsagaba ti cleft lip ket mabalin pay a maoperaan dagiti adda ti bukol iti rupada a libre.
Mainaig iti daytoy, kunana a daytoy a programa ket babaen iti panagbibinnulig ti Philippine Red Cross ken lokal a gobierno iti ili ti Vintar.
Kabayatanna, naammoan a daytoy ket tinawen a maisaysayangkat tapno matulungan ken maisubli ti nasam-it nga isem dagiti maseknan nga umili.
