LAOAG CITY – Nailungalong iti Sangguniang Bayan ti naiget a pannakaipawil iti panagpuor ti garami iti kataltalonan iti ili ti Vintar.
Segun ken ni Vice Mayor Maribel Albano iti nasao nga ili, babaen iti daytoy nga addang ket mas ad-adda a malappedan ken maliklikan dagiti mannalon a puuranda dagiti garami dagitoy.
Inbatadna nga addanto ti maisayangkat a panagtataripnongda nga agpanpanday linteg pakairamanan dagiti maseknan a mannalon maipapan iti nasao a banag.
Kunana a kalikagumda a mapaayaban dagiti grupo ti sanjera tapno mapagnunumoan a naimbag dagiti masapol a maipakat iti ordinansa.
Inlawlawagna nga adda ti 500 a pisos a nailungalong nga agbalin a multa para kadagiti naglabsing iti nasao a pagannurutan.
Innayonna a namunganay iti nasao a reklamo kalpasan a naruay dagiti residente ti agrekreklamo gapu iti nakaro nga asok gubuay iti panagpuor ti garami iti kataltalonan.
