LAOAG CITY – Inpasingked ni Engr. Alejandro Bong Taylan, ti maysa kadagiti operators ti Cockpit Arena ditoy siudad ti Laoag a nakabayad dagitoyen kadagiti rental fees ken surcharges iti pannakausar ti galyera.
Segun kenkuana, umabot iti nasurok maysa a milyon a pisos ti binayadanda para iti uneg ti maysa a tawen a panagoperar ti Cockpit Arena.
Inbatadna a nakasagana daytoy a mangipakita ti kopya a mangipaneknek a nakabayad dagitoyen iti pagrebbenganda kas operator ti galyera.
Inlawlawagna a ti galyera ket adda ti kontrata iti franchisee banag a rumbeng a mabayadan para iti legal a pannakaipalubos ti operasion daytoy.
Kunana a saanda a tarayan dagiti obligasionda iti lokal a gobierno ditoy siudad ti Laoag iti baet nga adda dagiti nalabsingda a pagalagadan ngem inadmitirna nga adda ti nagkuranganda.
Mainaig iti daytoy, kiniddaw ni Engr. Taylan kadagiti amin nga cockpit operators a pagnunumoanda ti aldaw a pannakausar ti galyera.
Inpalgakna a nagoperarda idi Pebrero 15 gapu ta isu iti nairanta nga iskedyul iti operasionda ken adda ti special permit iti nasao nga aldaw.
Inpakaammona a nagkiddaw ni Sangguniang Panlungsod Member Atty. Jason Perera kadakuada tapno maiyakar ti petsa iti operasionda nga imbes a Pebrero 16 no sadino ket pinatganda daytoy a banag.
Innayonna nga idi saanda unayen a nasinged nga agkadua ket ditoyen a nangrugi ti saan a nasayaat a panagkaduadan nga isu ti nagrugian dagiti gundaway nga adda ti saanda a panagkikinnaawatan.
Maipalagip a kwinestionaran ni Konsehal Perera dagiti operators ti Cockpit Arena ditoy siudad ti Laoag kalpasan a naduktalanna a saan pay a nagbayad dagitoy iti abang ti pasdek ken lote iti galyera.
