LAOAG CITY – Nangisayangkat ti taripnong dagiti opisial ken miembro ti Peddlers Association ditoy siudad ti Laoag.
Daytoy ket tapno mapagnunumoan ti agbalin a plastar dagitoy nga aglako.
Segun ken ni Ms. Eva Marie Dumlao, Licensing Officer III ti Business Permit and Licensing Office ditoy siudad nga adda ti naputar a resolusion a daytoy ti masurot a wagas a panaglako dagitoy.
Inlawlawagna a nakailanad iti resolusion dagiti masurot a sizes iti cart wenno luganda pakairamanan ti oras ken no ania laeng dagiti lugar a mabalin a pagianan dagitoy nga aglako.
Inbatadna nga iti agdama ket adda pay laeng ti mapmapan aglaklako iti sango ti Mariano Marcos State University – College of Teacher Education ken iti igid ti kapitolio probinsial ngem dagitoy ket in-inot a maplastar.
Kunana a maiyur-uray laengen ti pannakaaprobar ti konseho ditoy siudad ti Laoag ti naputar a resolusion a para kadagiti peddlers tapno insigida a maiyimplementar. .
Kabayatanna, inpanamnamana ti pannakaplastar dagiti peddlers tapno saan dagitoy a mangitunda ti trapiko ken dadduma pay.
