LAOAG CITY – Maragsakan dagiti opisyales iti Brgy. 49-B Raraburan ditoy ciudad ti Laoag iti pannakatiliw ti maysa a babai babaen ti NBI a maipagarop a mangibugbugaw kadagiti pada na a babbai pakairamanan ti menor de edad.
Segun kadagitoy, nupay naladaw a naamoan da nga adda ti naiyuswat nga operasyon iti barangay da ket napalaos ti panagyaman da iti ahensya.
Inbatad ni Barangay Chairman Elmer Maulit a nabayagen nga adda ti makitkita da a mapmapan a babbai iti maysa a kubo-kubo nga adda iti tengnga ti taltalon iti barangay da a kukua ti maysa a senior citizen.
Kunana nga adda ti gundaway idi a napan dagiti kameng tiPNP iti lugar gapu ta agririri dagiti babbai gapo ti maipagarop nga innagaw iti nobyo.
Inpetteng na a saan da a nagsardeng a nagmonitor ken binagaan da ti agtagkikua iti kubo-kubo a saan nga agpaspasangbay kadagiti babbai a saan met a bumaranggay.
Nupay kasta, kunana a nagtultuloy latta ti papan dagiti babbai ngem inpetteng ti lakay a pagayam na dagitoy.
Kabayatanna, kuna pay dagiti kagawad nga akin-sektor ken akin-komite ti peace and order a kanayon da a monmonitoren daytoy nangruna iti rabii ken kanayon met a maballaagan.
Mangnamnama met dagiti opisyales nga ita a natiliwen ti maipagarop a bugaw ket awanen ti iligal nga aktibidad iti barangat da gapo ta patyen da a makaperdi daytoy iti imahe ti lugar da.
