LAOAG CITY – Inbatad ni Atty. Joel Gines, ti Provincial Election Supervisor a balligi ken naan-naayas ti insayangkat da nga Oplan Baklas idi laeng kalman, Abril 20.
Segun kenni Gines, kangrunaan na a nagikkatan da kadagiti campaign posters ket iti poste, puon ti kayo, waiting shed ken iti rangtay.
Inlawlawag na a ditoy ciudad ti Laoag, iti ili ti San Nicolas ti kaadoan kadagiti nakaalaan da kadagiti campaign materials a saan a naipan iti common poster area.
Nagyaman met ni Gines kadagiti amin a timmulong iti inyuswat da nga Oplan Baklas kangrunaan na iti DPWH ken iti PNP.
Mainaig iti daytoy, kun ani Gines a mabalin a ti rason no apay nga ado latta dagiti maisab-it a campaign materials ket gapo iti kaawan pay ti naipaayan ti pagmenna-mennaan ken ti kinatangken ti ulo dagiti supporters.
Kabayatanna, nagpalagip ni Gines a sumurot kuma dagiti supporters dagiti kandidato iti pagalagadan ti Comelec seknan iti panangipan kadagiti campaign posters.
Immapela pay ni Gines a tapno agtultuloy ti kinatalna mainaig iti eleksyon ket liklikan ti panagkikinnantyaw no diket ti plataporma laeng ti irakurak kadagiti botante.
