LAOAG CITY – Naaprobaran iti maikadwa a pannakaibasa na ti ordinansa a pannakaipalubos ti backride kadagiti tricycle ditoy ciudad ti Laoag.
Segun iti chairman ti Committee on Transportation iti konseho, daytoy nga addang ket dakkel a tulong tapno manayunan ti birok dagiti tricycle driver iti inaldaw.
Inlawlawagna nga apaman a maoprobaran daytoy nga ordinansa ket masapol a sumurot dagiti tricycle driver kadagiti pagalagadan a naaramid para iti kinatalged dagiti pasahero dagitoy.
Segun kenkuana, rumbeng a dagiti tricycle driver ket addaan iti usto a footrest wenno armrest a pagkaptan dagiti agbackride, sun cover wenno usto a linong ti likod; dagiti laeng agtawen ti 13 agpangato iti tawenna ti mabalin nga agyan iti likud, agingga iti 4 nga indibidual iti mabalin nga ilugan dagitoy karamanen iti backride, addaan iti nalawag a silaw ken kasapulan nga agusar ti high visibility vest no rabii.
Inpakaammo na nga umabot iti 200 a pisos ti multa dagiti saan a sumurot kadagitoy a pagganurutan.
