LAOAG CITY – Naaprubaran kabayatan ti regular session ti Sang Panlungsod ditoy ciudad ti Laoag iti maikatlo ken maudi a pannakabasa ti maysa nga ordinansa a mangpaiget ken pannakaestablisar ti Africa Swine Fever (ASF) Task Force.
Daytoy ket bukbuklen ti Committee on Health, Committee on Agriculture, Committee on Environment, Veterinary Office, City Planning, Hog Raisers ken Public Sanitation.
Babaen iti nasao nga ordinansa ket adda ti dagus a mangkita ken mangiwanwan iti Culling operation ken ti agplano iti rumbeng a maaramid para kadagiti maapektaran iti daytoy.
Kabayatanna, uray ti ordinansa a pannakaisubli ti night market ditoy ciudad ti Laoag ket inaprubaran payen ti konseho iti pannakaiyuswat ti regular session.
Gapu iti daytoy, iti pannakaisubli ti night market ket temporaryo met a mapaserraan ti Abadilla St. ken Villanueva St. Ditoy ciudad.
Maiprayoridad met dagiti adda ti pwesto na iti uneg ti merkado publiko ditoy ciudad a manggundaway ti night market laketdi masurot ti minimum health protocols ken oras a panaglako.
Naipalaon iti ordinansa a mangrugi iti oras ti 3:30 ti malem agingga iti alas-8:30 iti rabii.
Nupay kasta, mapagsasaritaan pay laeng no kaanu ti panangrugi ti night market ditoy ciudad ti Laoag.
