LAOAG CITY – Naitantan ti pannakatratar ti ordinansa mainaig ti pannakaipaay ti tulong pinansyal kadagiti indigent a mangala ti board examination iti ciudad ti Batac.
Daytoy ket kalpasan a kwinestyunaran ni Atty. Windel Chua, bise mayor iti ciudad no naidasaren daytoy nga ordinansa iti Local Finance Committee.
Inlawlawag ni Chua a masapol a maadal a naimbag ti komite daytoy a banag no masustinir ti lokal a gobierno ti nasao a programa.
Nupay kasta, inadmitir ni Sang Panlungsod member Bismark Quidang a saanna pay a naidasar daytoy iti nasao a komite.
Inbatad ni Quidang a napanunot na ti nangipasa ti nasao nga ordinansa gapu ta naamoan na nga ado dagiti indigents nga agturturpos iti Mariano Marcos State University (MMSU) iti ciudad a saan a dagus a makaala ti board examination gapu ta awan ti gastusen da.
Innayon na nga adda ti panagadal a kabayatan a bumaybayag ti saan a panangala ti eksaminasyon ket bumasbassit met ti tiyansa na a maipasa daytoy.
