LAOAG CITY – Inbatad ni Outgoing Vice Mayor Editho Balintona a kinasarita na ni Vice Mayor-elect Virgilio Agoto iti ili a Sarrat.
Daytoy ket kalpasan nga adda dagiti maipagarop nga agpapaliiw iti balay ken farm ni Agoto.
Inlawlawag na a kalpasan a naamoan na ti mapaspasamak ken ni Agoto ket kinasarita na a dagus daytoy tapno agdamag ken mabalakadan na ti incoming vice mayor.
Kuna ni Balintona, iti kinabayag nan ti pulitika ket napadasan na met ti mapaspasamak ken ni Agoto iti agdama.
Indiaya pay ni Balintona ken ni Agoto a tulungan na daytoy nga agamiris iti maisayangkat nga imbestigasyon, gapu ta ti umuna a masaludsud ken amwen dagiti otoridad ket ti motibo ken no siasinno ti mabenepisyaran no adda ti dakes a mapasamak kenkuana.
Innayon na nga adda man wenno awan ti mapasamak ken ni Agoto ket obligado a bumaba iti pwesto na.
Inadmitir ni Balintona nga isuda ti mapagat-atapan nga adda ti likudan ti mapaspasamak ken ni Agoto isut gapuna nga adda ti panagdanag da nga agasawa.
Segun kenkuana, agamak amangan no adda ti mangsugsug kenni Agoto nga unnaan na laengen ti atapen na nga adda ti likudan ti mapaspasamak kenkuana iti agdama.
Kabayatanna, Kinumpirmaran ni Mayor Remigio Medrano iti Sarrat, Ilocos Norte a napan iti opisina na ni Vice mayor-elect Virgilio Agoto tapno idanun na ti kaadda dagiti maipagarop nga agpangpangta ti biagna.
Gapu ti daytoy, binalakadan ni Medrano ni Agoto a masapol nga agannad.
Inpetteng ti mayor a dagiti agpanpanunot ti dakes iti pada da a tao ket awan ti karbengan da nga agtalinaed iti naulimek ken nadalos a komunidad.
Kuna na a dagitoy ti makaperdi iti linak, urnus ken talna iti maysa nga ili.
Mangnamnama ni Mayor Medrano a makaamiris ken agpanunot ti nasayaat dagiti agpangpanggep ti saan a nasayaat ken ni Agoto.
