LAOAG CITY – Immapela ti liderato ti Overseas Workers Welfare Administration (OWWA) iti kamara de representantes a nayunan ti nailatang a pondo ti ahensya para iti emergency repatriation program iti sumaruno a tawen.
Inpetteng ni OWWA Administrator Atty. PY Caunan nga imbes a kissayan ti pondo, rumbeng a nayunan daytoy tapno ad-ado nga Overseas Filipino Workers (OFWs) ti matulungan ken maipaayan ti naan-anay a tulong iti baet dagiti krisis iti sabali a pagilian.
Basar iti nailungalong a 2027 national budget, bimmaba iti P900 milyon ti alokasyon para iti emergency repatriation, nababbaba daytoy no ikompara iti P1.2 bilyon a pondo a naipaay iti napalabas a tallo a tawen.
Inlawlawag ni Caunan a saan nga umdas ti nasao a kantidad aglalo ket agtultuloy ti krisis iti Middle East ken dadduma pay a rehiyon no sadinno a rinibo a Pilipino ti mabalin nga agkasapulan ti dagus a pannakaibakwit.
Gapu iti daytoy, pormal a kiniddaw ti OWWA ti nayun a P575 milyon para iti emergency repatriation fund para intono 2027, kagiddan ti panangadmitir ti nasao nga opisina a maib-ibusen ti regular repatriation budget da gapu iti agtultuloy a panangpaawid da kadagiti kadaraan a maip-ipit iti riribok.
Inaramid daytoy ni Caunan kabayatan ti pannakaisayangkat ti deliberasyon ti kamara de representantes iti nailungalong a pondo ti Department of Migrant Workers (DMW).
