LAOAG CITY – Aprobado iti umuna a pannakaibasa iti Sangguniang Panlalawigan ti pundo ti probinsia nga umabot ti 1.9 bilyon a pisos para iti tawen 2021.
Daytoy ket kalpasan ti tallo nga aldaw a pannakaiyuswat ti Budget Hearing nga inatendaran dagiti kameng ti Sangguniang Panlalawigan nga idadauloan ni Bise Gobernador Cecilia Araneta Marcos, Local Finance Committee a bukbuklen ti Provincial Treasurer’s Office, Provincial Planning and Development Office, Provincial Budget Office ken Provincial Accounting Office.
Segun ken ni Bokal Atty. Donald Nicolas, Chairman ti Committee on Appropriations, natingiting a naimbag dagiti proposed annual budget iti kada Departamento ti gobierno probinsial tapno makita ken maammoan no ania ti pakaiturungan ti makaot a pundo iti tunggal opisina.
Inbatadna a kaaduan kadagiti opisina ket bimmaba ti nailatang a pundo para iti sumaruno a tawen gapu ta nakissayan dagiti programa ken aktibidadda gubuay iti COVID-19.
No pay kasta, inlawlawagna a naiprayoridad ti pundo ti probinsia iti benneg ti salun-at rason a ti Provincial Health Office ket addaan ti pundo nga umabot ti 78 a milyon a pisos tapno mausar para iti covid-19 response.
Kuna ni Nicolas a dagiti naudi nga opisina a natratar ken naarisit ti proposed annual budget na ket ti Provincial Health Office, District Hospitals, Provincial Social Welfare and Development Office, Provincial Local Disaster Risk Reduction and Management Office, Emergency Response Office, Vice Governor’s Office ken Sangguniang Panlalawigan Office.
Innayon ti bokal a maituloy ti Budget Deliberation para iti maikadua a pannakaibasa ti pundo ti probinsia intunno Lunes, Disyembre 14.
