LAOAG CITY – Inpila ti P10 fare hike petition ti transport group a Pinagkaisang Samahan ng mga Tsuper at Operators Nationwide (PISTON) iti Land Transportation Franchising and Regulatory Board (LTFRB).
No mapatgan, kalikagum ti Pinagkaisang Samahan ng mga Tsuper at Operators Nationwide nga agbalin a P23 ti minimum a plete iti jeep manipud iti agdama a P13.
Inbatad ni Pinagkaisang Samahan ng mga Tsuper at Operators Nationwide President Mody Floranda, saan a nakatulong ken temporario laeng a nakaluban ti gastosen dagiti driver iti ipapaay a fuel subsidy ti gobierno gapu ta naminsan laeng a daras daytoy isut gapuna a mariknada latta ita ti epekto ti nangato a presio ti produkto a petrolyo.
Inlawlawagna a saan a naan-anay a nakatulong ti temporario a pannakasuspenso ti excise tax iti Liquefied Petroleum Gas ken kerosene gapu ta ngimmato met ti presio ti magatgatang ken dadduma pay a serbisio kas ti maintenance fee dagiti lugan a nagbalin nga epekto ti kumarkaro nga oil price hike.
Kunana nga ad-adda a kalikagumda a maipatungpal ti P10 a nayon iti minimum a plete gapu ta daytoy ket nabayag a makatulong iti pamastrek dagiti operator ken driver.
Inpaganetgetna a bassit laeng ti P1 fare hike nga inaprobaran ti Land Transportation Franchising and Regulatory Board para kadagiti traditional jeepneys iti pagilian.
