LAOAG CITY –Opisialen nga inruar ti Land Transportation Franchising and Regulatory Board (LTFRB) ti baro a kanayonan a plete tapno maipaskil kadagiti pampubliko a lugan kas panangipakaammo iti publiko.
Segun ken ni, Mr. Cristal Sibayan, ti Region I Director ti Land Transportation Franchising and Regulatory Board (LTFRB), a daytoy ket naipatungpal iti intero a pagilian aa pakairamanan ti Ilocos Region.
Kunana a daytoy ket kanayonan a plete no sadinno a depende iti klase ti pampubliko a lugan. Iti traditional public utility jeep, naingato ti P14 iti umuna nga 4 a kilometro ken manayonan ti P2 ti per kilometro. Iti met modern public jeep, P17 pesos ti umuna nga 4 a kilometro ken adda kanayonan a P2.40 ti per kilometro.
Inlawlawagna a daytoy a petision ken nabayagen a naipila iti Central Office ngem naaprobaran laeng gapu iti agtultuloy a parikot dagiti agpaspasada gapu iti kelaat a panagngato ti maintenance cost ken panagbaliw-baliw ti presio ti produkto a petrolio.
Innayonna a daytoy ket inadal a nasayaat ti ahensia ken kas panangipaay ti solusion kadagiti pagkasapulan dagiti agpaspasada.
Mainaig iti daytoy, innayonna a pinalagipan dagiti commuters a saan nga agkedked nga ag-report no adda ti saan a nainkalintegan a singir ti plete wenno aglabsing ti nairuar a fare guide matrix gapu ta mabalin a makanselar ti franchise ti lugan.
