LAOAG CITY – Kalikagom ti maysa a tricycle driver a mapagbalin koma a 15 a pisos ti plete iti tricycle ditoy ciudad ti Laoag.
Inlawlawag ni Mr. Greg Manili Mendez, maysa a tricycle driver ditoy ciudad ti Laoag a nangato unay ti 20 a pisos ngem nababa met ti 11 a pisos a regular a plete idi awan pay ti pandemya.
Gapu iti daytoy, kuna na a para kenkuana ket kapintasan no mapagbalin a 15 a pisos ti plete iti tricycle tapno maabrot da ti paggasolina da.
Innayon na nga uray maymaysa ti pasahero da ket umanayen ti 15 a pisos a plete na ket saandan a rumbeng nga agpanayun pay.
Inadmitir na a no adda ti agplete kenkuana iti 20 a pisos ket awaten na latta ngem no agdamag ti pasahero na ket ti 11 a pisos a regular a plete ti ibaga na.
Mainaig iti daytoy, nagpanawagan ni Mendez kadagiti pada na a tricycle driver a saan da koma a gundawayan wenno panginaan unay ti plete dagiti pasahero da tapno saanda a mababalaw amin.
Inyarig pay ni Mendez ti maysa a tiklis a kamatis a no adda ti maysa a nalungsot ket mairamraman aminen a kayat na a sawen ket agpapadan ti panagkita dagiti pasahero kadagiti amin a tricyle driver ditoy ciudad ti Laoag.
