LAOAG CITY – Inpasigurado ti Tourism Infrastructure and Enterprise Zone Authority (TIEZA) ti pannakailatang ti 180 a milyon a pisos para iti pannakapadur-as ti Paoay Lake ken Paoay Sand Dunes tapno ad-adu pay a turista ken investors ti maallukoy a bumisita ditoy Ilocos Norte.
Pinasingkedan daytoy ni Governor Matthew Marcos Manotoc a nakasaganan ti probinsia nga agbalin a maysa kadagiti premiere tourism destinations ditoy pagilian.
Mainaig ti daytoy, babaen iti Special Use Agreement for Protected Area, kitkitaen ti gobierno probinsial ti pannakapadur-as ti 387 nga ektaria a Paoay Lake National Park babaen iti pananginayon kadagiti amenities, kas kadagiti non-motorized water vessels no sadinno a para iti panangpapintas ket addaan daytoy ti 3 viewing stations.
Maitampok iti umuna nga estasion ti Paoay Lake Central Station nga addaan ti tourist center, cottage, retention wall, floating dock ken parking area ken embankment.
Ti maikadua nga estasion ket addaan ti clubhouse ken boathouse nga addaan ti floating dock idinto a ti maikatlo nga estasion ket maparang-ay a kas bird-watching zone a pakairamanan ti showcase ti pinakbet a maysa kadagiti nalalatak a taraon dagiti Ilokano.
